MANILA, Philippines — Nanawagan noong Miyerkules si Bise Presidente Leni Robredo sa kanyang mga tagasuporta na huwag mag-ambag sa mga masasamang gawain tulad ng pamba-bash dahil sa iba’t ibang pananaw, dahil ikinagalit niya ito.

“Isa ‘yan sa napakalaking frustration ko na dumating tayo sa punto na ‘pag hindi sang-ayon sa ating paniniwala ‘yung ibang tao ay away na agad ‘yung hanap,” sabi ni Robredo sa programa ng DZRH News na “Bakit Ikaw?”

“And ako, everytime nakikiusap ako, lagi ko ‘to sinasabi na—kaya nabuo ‘yung concept ng radical love, kasi ‘di ba ‘pag radikal parang kakaiba—so ‘yung sa ‘kin, kahit na nasasaktan tayo, kahit na nasa receiving end tayo ng masasama, ‘wag na tayo mag-contribute sa kasamaan. Mahirap siya,” dagdag pa ni Robredo.

Sinabi ni Robredo na naging isang kultura para sa mga taong may magkakaibang pananaw na harapin ang iba, lalo na sa online.

“Source siya ng frustration pero at the same time naiintindihan ko kung bakit nangyayari ito—hindi lang sa kampo namin pero sa lahat ng kampo—na ‘yung social media, again, naka-exacerbate dito dahil mayroong platform ‘yung lahat na magpahayag ng gusto nilang sabihin lalo pa dahil marami ngayon, pwede kang sabihin na may anonymity… So na-develop ‘yung culture na irresponsible na minsan ‘yung sinasabi,” pagpapalawig pa ni bise president Leni Robredo.

Nauna nang sinabihan ni Robredo ang kanyang mga tagasuporta na huwag pumatol sa bashers at gumawa nalang ng mabuti sa pagsusulong ng kanyang 2022 presidential bid.